മാസ്കണിഞ്ഞു നിൽക്കുമ്പോൾ

മാസ്കണിഞ്ഞു നിൽക്കുമ്പോൾ,
 നിന്റെ കണ്ണുകളുടെ ഭംഗി ഞാനറിയുന്നു.
**************************************************
യാതനകൾക്കും വേദനകൾക്കുമപ്പുറത്ത്,
സ്വയമൊരു മെഴുകു തിരിയായെരിയുന്ന
നിന്റെ പ്രാണന്റെ ജ്വാലയെ,
മതിലുകൾക്കുമടഞ്ഞ
വാതായനങ്ങൾക്കുമെതിരെ
 നിന്റെ തീനോട്ടങ്ങളെ,
**************************************************
കൂട്ടത്തിലായിരിക്കുമ്പോഴും
 തനിച്ചാകുന്ന നിൻ മോഹഭംഗങ്ങളെ,
എയ്തു വിട്ടു കുതിക്കുന്നരമ്പിന്റെ
മൂർച്ചയിൽ മദിക്കുന്ന ജീവിത തൃഷ്ണകളെ.
**************************************************
മൂടുപടത്തിന്റെ മങ്ങിയ നിറച്ചാർത്തുകളിൽ
തെളിയുന്ന നിൻ കണ്ണുകളിൽ,
കണ്ണുകളിലെ നറു മുന്തിരി തളിർപ്പുകളിൽ,
കണ്ണിലെ വെളിച്ചത്തിൻ മൊട്ടുകളിൽ, ഞാൻ കാണുന്നു, വീണ്ടും തളിർക്കാനും പൂക്കാനും പടർന്നു പന്തലിക്കാനും ഒരാകാശം .
**************************************************
അവിടെ ഞാനില്ലെങ്കിലെന്ത് ?
നിന്റെ കണ്ണുകളിൽ
വീണ്ടും വീണ്ടും ഞാൻ നിന്നെ കാണുകയാണ്. -CKR 16/05/2020
**************************************************