പാതാള മുനമ്പ്

 പാതാള മുനമ്പ് 

*********************************************

ചവിട്ടി പുറത്താക്കപ്പെട്ടവന്റെ സുവിശേഷമോണം 

ചതിക്കപ്പെട്ടവന്റെ തിരിച്ചുവരവിലാണോണം  

മഴയിൽ കുതിർന്നവളുടെ മന്ദസ്മിതമോണം 

മുള്ളിൻ പടർപ്പുകളിൽനിന്നുയിർത്ത കിനാപ്പൂക്കളിലോണം  

ചേറിലും വിയർപ്പിലും പുളകമായുണർന്ന കതിർമാലകളിലും  ,

വറുതികളൊഴിഞ്ഞു പാത്രങ്ങളിൽ നിറഞ്ഞ വിഭവങ്ങളിലും  ,

കരിംപുതപ്പു വകഞ്ഞു മാറ്റി തെളിയുന്ന ശശികലയിലുമോണം  .

ഇതൊക്കെ നമ്മളെയോർപ്പിച്ചവൾ റീത്താമ്മ     .

വളഞ്ഞു പിടിക്കപ്പെട്ടവളവളുടെ മുഖക്കനപ്പിലു- 

മുള്ളിലുറഞ്ഞ നൊമ്പരത്തിലുമവൾ-

വിറയോടെ മൊഴിഞ്ഞ മാപ്പിലും ,

പുതുമഴയിൽ പൂക്കളമൊലിച്ചു  പോയ പോൽ  

 മാഞ്ഞു മറഞ്ഞു പോയ്  നമ്മുടെയോണം .

പുതിയ വാമനൻ  വന്നിളിച്ചു നില്കുന്നു .

ഒരടിയളന്നെടുത്തു മതേതരത്വം ,

രണ്ടാമതളന്നെടുത്തു  പൗരത്വം ,

മൂന്നാമതളക്കാനുയരുന്നു   കാലുകൾ .

മറയും നാമെല്ലാമിനിയിരുണ്ട നാളുകൾ .

.............