എൽജി ,ബിറ്റി . ഐ ക്യു , എ പ്ലസ് അദൃശ്യർ
അറിഞ്ഞുവോ നിങ്ങളെന്നു
മദൃശ്യർ കുറച്ചു പേർ
എൽജി ,ബിറ്റി . ഐ ക്യു ,
എ പ്ലസ് മനുഷ്യരാണവർ .
അവരെന്നുമദൃശ്യരായി മരിച്ചു ജീവിക്കാൻ
വിധിച്ചതോ നമ്മൾ !
ഉണർന്നുതിന്നിട്ടുറങ്ങി ജീവിതം തീർക്കേ ,
ഉറക്കെച്ചിന്തിക്കാമെന്തിതിന്നു കാരണം
ചില മാരിവിൽമനുഷ്യരദൃശ്യരാകുവാൻ ?
പ്രണയത്തെ പല തട്ടിൽ തൂക്കിനോക്കുന്നു ,
പലജാതികളിലുരച്ചു മാറ്ററിയുന്നു .
ആണ് പെണ്ണിനെ പ്രണയിച്ചാൽ പോരാ ,
ഒരു ജാതി ,ഒരു മതം.,പിന്നെ പണവുമുണ്ടാകണം
പെണ്ണ്പെണ്ണിനെ പ്രണയിക്കും
പ്രണയം പ്രണയമാണല്ലോ .
ആണാണിനെ പ്രണയിക്കുന്നതും പ്രണയം .
പെണ്ണിലാണുണ്ടാണിൽ പെണ്ണുമതു ,
സൃഷ്ടിവൈചിത്ര്യം ,ജീവി വൈവിധ്യം !
പെണ്ണിൻ ദേഹവും ആണിൻ മനസ്സുമായ് ട്രാൻസ്ജൻഡർ ,
ആണിൻദേഹവും പെണ്ണിൻ മനവുമായുണ്ടാകാമവർ !
ആൺ പെൺ ദ്വന്ദ ദേഹികൾ
ഇന്റർ സെക്സുകാർ ,
പൊതുവായിവർക്കു
ക്യൂവരു *കാരെന്നു പേർ ,
ഇവരും നമ്മളുമൊരമ്മ തൻ മക്കൾ ,
മനുഷ്യരാണിവർ ,നമുക്കു തുല്യരും .
തുല്യത, നീതി, സന്തുലനം
എന്നൊക്കെയുണ്ടു ചില വാക്കുകൾ ,
ചില മൂല്യങ്ങളദൃശ്യമാവു-
ന്നതറിയുന്നുവോ സഖേ ?
ചില്ലു മതിലിലേറെ ചിറകു തല്ലി-
പ്പിടയുന്നുണ്ടു പല പറവജീവിതം !
ചില മതിലുകൾ മുൻവിധികളാൽ ,
ചില മതിലുകൾ ദുരാചാരങ്ങളാൽ .
ചില മതിലുകൾ വാർപ്പ് മാതൃകകൾ .
പുരുഷ കേന്ദ്രീകൃത വ്യവസ്ഥകൾ ,
വിവേചനങ്ങളാൽ നാമകറ്റിടുന്നുവോ ,
ശരണ മന്ത്രത്താൽ നാം ഭയപ്പെടുത്തുന്നോ ,
അദൃശ്യ ജീവിതം നയിക്കുമീ മനുഷ്യരെ ?.
ചില ജീവിതങ്ങൾ ചിലപ്പോൾ മാത്രമായ് ,
അദ്യശ്യമാകുന്നതേതുൾഭയത്തിനാൽ .
സമത്വമെന്നൊക്കെ,യതാർക്കു
വേണമെന്നു നീ വെറുത്തു ചൊല്ലുമ്പോൾ ,
കരിയും പുകയും
വിയർപ്പുമർപ്പിച്ച ,
ചില വിഗ്രഹങ്ങളെ
നീയദൃശ്യമാക്കയോ ?
അദൃശ്യയാകുന്നതു നിൻ മകൾ ,മകൻ
നിൻറെ പെങ്ങൾ , പ്രിയ കൂട്ടുകാരവർ .
അസമയങ്ങളിലസ്ഥാനങ്ങളിൽ
ശരണമയ്യപ്പായെ-
ന്നുറക്കെ ഘോഷിക്കേ ,
ശരണമാർക്കെ-
ന്നാർക്കുമാത്ര-
മെന്നൊരു കുറി-
യോർത്തുവോ ?
അദൃശ്യരാകുവോർ -
ക്കെല്ലാഭയമാകേണ്ടോർ ,
മനസ്സ് നന്നാക്കാൻ ,
നിനച്ചു ചൊല്ലട്ടെ ,
ശരണ മന്ത്രങ്ങൾ .
ഇരുളിൽ നിന്നെന്നും
വെളിച്ചത്തിലേക്കു നീ
തേടുന്നതു നിന്നെ
യാണെന്നറിവിലേക്കുമായ്
പതിനട്ടു പടവുകളേറി ,
നടന്നു നീങ്ങവേ
നിനക്കുമവൾക്കും നീ
പകുത്തെടുക്കേണ്ടും
രണ്ടമൃതകുംഭങ്ങൾ .
അദൃശ്യമാവുന്നോ ,
പാലാഴിപ്പരപ്പുമിങ്ങനെ ?
*****************************
- രാധാകൃഷ്ണൻ കണ്ണൂർ
**queer
No comments:
Post a Comment